Perezida Paul Kagame yakanguriye abanyarwanda kubungabunga ibyagezweho

Perezida Paul Kagame yakanguriye abanyarwanda kwita no kubungabunga ibyagezweho, akaba ari bumwe mu butumwa yagarutseho mu gikorwa cy’umuganda rusange usoza ukwezi kwa Gicurasi 2023 yari yitabiriye ari kumwe n’umufasha we Madamu Jeannette Kagame, ukaba wakozwe haterwa ibiti muri pariki ya Nyandungu Eco-Park.

Nyandungu Eco-Park ni pariki iri mu gishanga cya Nyandungu gitandukanya uturere twa Kicukiro na Gasabo, mu Mujyi wa Kigali.

Uyu muganda wanitabiriwe n’amakipe yitabiriye irushanwa nyafurika rya Basketball, BAL, ndetse n’abayobozi b’ishyirahamwe rya Basketball ku Isi no muri Afurika.

Umuganda ngarukakwezi ubaye mu gihe hitegurwa umunsi w’Ibidukikije, uzaba kuwa 5 Kamena uyu mwaka, ukaba wabanjirijwe n’icyumweru cy’Ibidukikije.

Mu mwaka wa 2022, nibwo Nyandungu Eco-Park yafunguye amarembo, maze benshi mu banyarwanda n’abanyamahanga baturutse ahantu hatandukanye batangira gusura ibyiza nyaburanga biyigize.