Perezida Kagame yakanguriye abanyarwanda kwita no kubungabunga ibyagezweho

Ubu ni bumwe mu butumwa Umukuru w’Igihugu Paul Kagame yagarutseho mu gikorwa cy’umuganda rusange usoza ukwezi kwa Gicurasi 2023 yari yitabiriye arikumwe n’umufasha we Jeannette Kagame, ukaba wakozwe haterwa ibiti muri pariki ya Nyandungu, Nyandungu Eco Park.

Ni pariki iri mu gishanga cya Nyandungu gitandukanya uturere twa Kicukiro na Gasabo mu Mujyi wa Kigali.

Uyu muganda wanitabiriwe n’amakipe yitabiriye irushanwa nyafurika rya Basketball, BAL, ndetse n’abayobozi b’ishyirahamwe rya Basketball ku Isi no muri Afurika.

Umuganda ngarukakwezi ubaye mu gihe hitegurwa umunsi wahariwe ibidukikije, uzaba kuwa 5 Kamena uyu mwaka. Ukaba wabanzirijwe n’icyumweru cy’ibidukikije.

Nyandungu Eco-Park yafunguye amarembo mu 2022, benshi mu Banyarwanda n’abanyamahanga baturutse ahantu hatandukanye batangira gusura ibyiza nyaburanga biyigize.

Ikigo cy’Igihugu gishinzwe kurengera Ibidukikije, REMA, giheruka gutangaza ko gikeneye miliyoni 150 Frw zo kwagura Pariki y’Ubukerarugendo bubungabunga Ibidukikije ya Nyandungu Nyandungu Eco Park-NEP.