Rayon Sports igiye guhagararira u Rwanda muri CAF

Bidasubirwaho, ikipe ya Rayon Sport igiye guhagararira u Rwanda muri CAF Confederation Cup 2023-2024, bikaba bibaye nyuma y’uko ikipe ya APR FC yegukanye igikombe cya shampiyona cya 2022-2023 , bigaha amahirwe iyi kipe ya Rayon Sports yo kuzahagararira u Rwanda muri aya marushanwa.

Bisanzwe bimenyerewe ko ikipe yegukanye igikombe cya shampiyona n’icy’Amahoro, ikipe yabaye iya kabiri muri shampiyona niyo iserukira u Rwanda muri CAF Confederation Cup. Bisobanuye ko iyatwaye shampiyona niyo igomba gusohoka muri CAF Champions League.

Umwaka ushize nibwo FERWAFA, Ishyirahamwe ry’Umupira w’Amaguru mu Rwanda, ryahinduye itegeko maze rivuga ko mu gihe ikipe yatwaye shampiyona itwaye n’igikombe cy’Amahoro, iyageze ku mukino wa nyuma w’igikombe cy’Amahoro izajya iba ari yo isohokera u Rwanda muri CAF Confederation Cup.

Kuba APR FC yaraye yegukanye shampiyona y’icyiciro cya mbere mu Rwanda umwaka w’imikino wa 2022-23, byayihaye kuba ari yo izahagararira u Rwanda mu mikino y’amakipe yabaye aya mbere iwayo muri Afurika (Champions League).

APR FC kandi ikaba iri no ku mukino wa nyuma w’igikombe cy’Amahoro izahuramo na Rayon Sports tariki ya 3 Kamena 2023 kuri Stade Mpuzamahanga ya Huye.

Ibi bivuze ko Rayon Sports yakwegukana igikombe cy’Amahoro cyangwa se itanacyegukanye, yamaze kubona itike ya CAF Confederation Cup kubera ko ikipe bazahura ku mukino wa nyuma, APR FC yegukanye shampiyona ikaba izasohoka muri Champions League.

mu mwaka wa 2019, nibwo Rayon Sports yaherukaga gusohoka mu mikino Nyafurika ubwo yakurwagamo na Al-Hilal Omdurman yo muri Sudani. Ni nyuma y’uko amakipe yombi yanganyirije i Kigali 1-1 maze muri Sudani banganya 0-0.

Umwaka wari wabanje, iyi kipe yari yanditse amateka yo kugera muri 1/4 cya CAF Confederation Cup.